Mae'r Dyfarniad a Diploma Lefel 1 mewn Celf a Dylunio yn gwrs blwyddyn o hyd, wedi'i gynllunio i roi cyflwyniad i'r sector creadigol i ddysgwyr. Mae'n eu galluogi i wneud penderfyniadau gwybodus ynghylch eu camau dilyniant yn y dyfodol, tra'n datblygu ac yn cymhwyso eu gwybodaeth ac ennill ystod o sgiliau ymarferol, cyfathrebu a datblygiad personol perthnasol.
Mae'r cwrs wedi'i strwythuro'n gyfanswm o saith uned orfodol.
Mae Unedau 1 a 2 yn ffurfio'r Dyfarniad, gan roi cyfle i archwilio deunyddiau, dulliau a phrosesau sy'n cefnogi llawer o weithgareddau celf a dylunio, ac i ddechrau datblygu sgiliau cysylltiedig.
Cyflawnir y Diploma mewn Celf a Dylunio drwy gwblhau Unedau 3 i 7, sydd wedi'u cynllunio i adeiladu ar y sgiliau, y wybodaeth a'r ddealltwriaeth a gafwyd drwy'r Dyfarniad, gan ddarparu cyfle i archwilio, datblygu a phrofi creadigrwydd.
Mae Uned 7 yn Brosiect Mawr Terfynol, sy'n galluogi myfyrwyr i ddangos yr holl ddysgu sydd wedi digwydd drwy gwblhau'r unedau eraill, drwy gymhwyso eu gwybodaeth, eu sgiliau a'u dealltwriaeth er mwyn cwblhau aseiniad yn llwyddiannus.
3 TGAU gradd E neu uwch (gan gynnwys Mathemateg/Rhifedd a Saesneg neu Gymraeg Iaith Gyntaf). A/neu Dystysgrif Estynedig Mynediad Lefel 3 ar radd Teilyngdod, ynghyd â chymwysterau sgiliau Mynediad Lefel 3 perthnasol.
Mae pob uned yn cael ei hasesu a'i safoni'n fewnol, yn amodol ar weithdrefnau sicrhau ansawdd y Corff Dyfarnu.
Mae Dyfarniad Lefel 1 yn cynnwys dwy uned orfodol (Unedau 1 a 2), y mae'n rhaid eu cwblhau'n llwyddiannus cyn symud ymlaen i'r unedau sy'n weddill (Unedau 3 i 7) er mwyn ennill y Diploma.
Caiff yr uned olaf ei safoni'n allanol gan y Corff Dyfarnu a'i graddio fel Pas, Teilyngdod neu Ragoriaeth, ac mae'n pennu gradd gyffredinol y cymhwyster.
Ar ôl cwblhau'r Diploma Lefel 1 mewn Celf a Dylunio yn llwyddiannus gyda gradd Teilyngdod neu uwch, a sicrhau Pas mewn Sgiliau Lefel 1, byddwch yn gymwys i wneud cais am ein cwrs Lefel 2 mewn Celf a Dylunio.












