Canmoliaeth i Goleg y Cymoedd yng Ngwobrau Beacon AoC eleni

Yn ddiweddar, dathlodd Coleg y Cymoedd ei Dîm Pontio Dwys (sy’n rhan o’r Ddarpariaeth Dysgu Ychwanegol) am ennill Safon Beacon a Statws Canmoliaeth Cymdeithas y Colegau (AoC) am eu hymateb arloesol i Gòd ADY Cymru 2021.

Cymeradwywyd eu model arloesol fel system gymorth ragorol i fyfyrwyr yng Ngwobrau Beacon AoC eleni.

Mae’r Model Pontio Dwys (MPD), a ddatblygwyd i gynorthwyo dysgwyr ag Anghenion Dysgu Ychwanegol (ADY) neu anableddau cymhleth yn eu cyfnod pontio i’r coleg, wedi bod yn eithriadol o lwyddiannus yn y dwy flynedd ddiwethaf.

Yn ystod seremoni cyflwyno tystysgrifau rhoes y Pennaeth, Jonathan Morgan, ganmoliaeth i’r tîm am eu cyfraniad amhrisiadwy, yn enwedig mewn dwy o siroedd mwyaf economaidd ddifreintiedig Cymru sef RhCT a Chaerffili. Mae ymdrechion y tîm yn sicrhau dyfodol mwy disglair i’r dysgwyr y maent yn eu cefnogi bob dydd.

Mae’r MPD yn gweithio drwy greu cynlluniau datblygu wedi’u teilwra a thîm pontio traws-gampws pwrpasol sy’n cydweithio ag ysgolion a phartneriaid. Mae’r dull hwn yn gwella llwybrau’r dysgwyr hyn yn sylweddol, gan ganiatáu iddynt aros yn eu hardaloedd lleol a’u grwpiau cymdeithasol, gan roi’r sefydlogrwydd y mae mawr ei angen arnynt.

Yn ogystal, mae’r MPD yn lleihau’r risg na fydd y dysgwyr hyn mewn cyflogaeth, addysg na hyfforddiant (NEET). Mae’n symleiddio’r broses o rannu gwybodaeth rhwng ysgolion a thîm cofrestru’r coleg, gan leddfu llwythi gwaith a galluogi addysg wedi’i phersonoli i ddiwallu anghenion dysgwyr yn effeithiol.

Mae cyflwyno’r MPD wedi arwain at fwy o gydweithio ag ysgolion, cynnydd mewn partneriaethau, a mwy o ymwybyddiaeth o’r model. Mae hyn wedi gwella’r gefnogaeth gyffredinol i’r rhai sy’n cael eu haddysgu yn y cartref neu’n rhywle arall heblaw yn yr ysgol, gan gyfrannu at lwyddiant a chanlyniadau cadarnhaol myfyrwyr a’u teuluoedd (AHY ac ADdC).

Llongyfarchodd Pennaeth Cynorthwyol Profiad y Dysgwr, Lisa Purcell, y tîm hefyd am eu gwaith rhagorol ac enw da cynyddol y coleg yn y gymuned leol. Mae cwmnïau allanol wedi canmol y tîm am gyflawni’r damcaniaethau rhagorol y maent yn eu hyrwyddo.

Rhannodd cynrychiolydd o ADdC (Addysg Ddewisol yn y Cartref) RhCT: “Ers gweithio gyda’r tîm, rydyn ni wedi cael mwy o ddysgwyr ADdC yn y coleg nag erioed o’r blaen! Mae’r niferoedd yn parhau i dyfu flwyddyn ar ôl blwyddyn. Mae’r tîm mor gynhwysol, cefnogol ac yn bwysicaf oll maen nhw wedi ennill ymddiriedaeth dysgwyr sy’n cael eu haddysgu gartref a’u teuluoedd. Mae hon yn dasg anodd pan nad yw llawer ohonyn nhw wedi defnyddio unrhyw wasanaethau eraill ers cryn amser ac wedi colli pob ffydd mewn addysg.”

Ychwanegodd Maria Morris, Swyddog Addysg Gartref ar gyfer AHY (Addysg Heblaw Ysgol) yng Nghyngor Bwrdeistref Sirol Rhondda Cynon Taf: “Mae ymgysylltiad dysgwyr ADdC blwyddyn 11 a’u teuluoedd wedi cynyddu’n sylweddol dros y blynyddoedd. Mae’r coleg wedi darparu amgylchedd croesawgar, cefnogol ac anfeirniadol lle mae dysgwyr a’u teuluoedd yn gallu mynegi eu hunain yn llawn a bod â hyder yn y tîm sy’n eu cefnogi. Mae pobl ifanc a’u teuluoedd yn hynod ddiolchgar am y cymorth helaeth sydd ar gael gan y Tîm Pontio Dwys.”

Llwyddiant Allweddol y Model Pontio Dwys:

• Mwy o gefnogaeth ADY: Cynnydd o 81 o ddysgwyr yn cael mynediad at gefnogaeth ADY yn 2024, gan ddangos cyrhaeddiad ac effaith y model.
• Mwy o bartneriaethau: Gwelodd y MPD gynnydd o 12 partneriaeth ag ysgolion, gan amlygu ymwybyddiaeth a chydweithio cynyddol.
• Gwell Adolygiadau CDU: Cynnydd o 106% yn yr adolygiadau CDU a fynychwyd, sy’n dynodi pontio mwy gwybodus i ddysgwyr.
• Ymgysylltu Gwell: Cynnydd o 950% mewn ymgysylltiad â dysgwyr AHY ac ADdC, gan ddangos effeithiolrwydd y model.
• Cadw mwy o ddysgwyr: Roedd 91% o ddysgwyr oedd angen cymorth ADY yn parhau i fod wedi cofrestru ar eu cyrsiau erbyn Tachwedd 2023.

Llongyfarchiadau i’r Tîm Pontio Dwys am eu gwaith anhygoel!

Share!