Mae staff Coleg y Cymoedd yn datblygu apiau VR i gefnogi prentisiaid Iechyd a Gofal Cymdeithasol

12 Chwefror 2026

Mae tîm Iechyd a Gofal Cymdeithasol Coleg y Cymoedd wedi bod yn gweithio gyda chydweithwyr ym maes Dysgu a Gyfoethogir gan Dechnoleg i ddatblygu dau ap dysgu realiti rhithwir (VR) newydd, sydd wedi’u cynllunio i gefnogi prentisiaid sy’n astudio iechyd a diogelwch plant a gofal dementia.

Tyfodd y syniad o ymweliad â Denmarc a ariannwyd gan Taith, lle gwelodd staff sut roedd VR yn cael ei ddefnyddio i gefnogi hyfforddiant iechyd a gofal cymdeithasol. Wedi’u hysbrydoli gan yr hyn a brofwyd, dechreuodd y tîm archwilio sut y gallai dulliau tebyg wella dysgu i brentisiaid y Cymoedd.

Mae’r apiau VR yn gosod dysgwyr mewn lleoliadau gofal realistig, gan roi’r cyfle iddyn nhw archwilio amgylcheddau, adnabod risgiau a magu hyder mewn ffordd ddiogel a rheoledig. Y nod yw helpu prentisiaid i ddeall yn well sefyllfaoedd bywyd go iawn y gallan nhw eu hwynebu yn eu rolau cyn dod ar eu traws yn ymarferol.

Bydd yr apiau yn cael eu treialu yn ddiweddarach eleni, gyda’r potensial i wneud dysgu yn fwy rhyngweithiol ac i fagu hyder prentisiaid.

Dywedodd y Darlithydd Iechyd a Gofal Cymdeithasol, Rebecca Bennett: “Mae prentisiaid yn dysgu orau pan allan nhw brofi sefyllfaoedd drostyn nhw eu hunain. Mae’r apiau hyn yn rhoi profiad i ddysgwyr o senarios bywyd go iawn ac yn helpu i wneud dysgu yn fwy ystyrlon.”

Mae’r peilot yn nodi cam pellach yn ymagwedd y coleg at ddefnyddio arloesedd digidol i gefnogi dysgu galwedigaethol a chryfhau’r ddarpariaeth prentisiaethau. Dysgu rhagor am brentisiaethau yng Ngholeg y Cymoedd.

Mae staff Coleg y Cymoedd yn datblygu apiau VR i gefnogi prentisiaid Iechyd a Gofal Cymdeithasol

Aberdâr

Nantgarw

Rhondda

Ystrad Mynach