Caffael

Ynghylch

Croeso i dudalen allanol Adran Caffael Coleg y Cymoedd. Cynlluniwyd y dudalen hon i ddarparu gwybodaeth i ddarpar gyflenwyr.

Mae gan y Coleg drosiant blynyddol o £41m. Wrth wario oddeutu £ 9m y flwyddyn ar nwyddau a gwasanaethau fel TG, gwasanaethau glanhau, teithio, offer, gwasanaethau ymgynghori ac adeiladu, rhaid i’r Coleg sicrhau gwerth am arian a chydymffurfiaeth.

Mae penderfyniadau prynu o ddydd i ddydd ar lefel adrannol sy’n caniatáu system gyllidebu â chyfrifoldeb datganoledig. Mae gweithgarwch caffael gwerth uchel (> £ 25,000) yn cael ei dendro gan yr adran berthnasol sydd yn y sefyllfa orau i wneud penderfyniadau i ddiwallu’r anghenion gweithredol.

I gysylltu â’r Adran Caffael, anfonwch e-bost at procurement@cymoedd.ac.uk.

Gwydodaeth gyflenwyr

Gwybodaeth i Gyflenwyr Mae Coleg y Cymoedd yn hysbysebu cyfleoedd contract lle bo’n briodol, ac mae hefyd yn prynu drwy gytundebau fframwaith y sector cyhoeddus sydd eisoes wedi mynd drwy broses dendro gystadleuol.

Mae’r Coleg yn cynnal prosesau caffael uwchlaw’r trothwyon perthnasol yn unol â Deddf Caffael 2023 a Rheoliadau Caffael (Cymru) 2024. O dan y trothwyon hynny, rydym yn dilyn ein Polisi Caffael.

Rydym yn hysbysebu ein cyfleoedd contract ar GwerthwchiGymru (Sell2Wales), sef gwefan gaffael genedlaethol Cymru. Mae cofrestru yn rhad ac am ddim, a gallwch osod hysbysiadau fel y cewch wybod pan fyddwn yn cyhoeddi cyfle sy’n cyd-fynd â’ch busnes.

Mae’r Coleg yn ddarostyngedig i Ddeddf Rhyddid Gwybodaeth 2000. Gall gwybodaeth a ddarparwch i ni fel rhan o ddyfynbris neu dendr gael ei datgelu mewn ymateb i gais am wybodaeth, yn ddarostyngedig i’r eithriadau a nodir yn y Ddeddf. Os ydych yn ystyried bod unrhyw ran o’ch gwybodaeth yn fasnachol sensitif, nodwch pa rannau yw’r rhain a’r rheswm dros hynny wrth ei chyflwyno.

Rydym yn prosesu data personol sy’n ymwneud â chysylltiadau ein cyflenwyr yn unol â deddfwriaeth diogelu data’r DU. Mae ein Hysbysiad Preifatrwydd yn egluro pa wybodaeth rydym yn ei chasglu, pam rydym yn ei chasglu, a beth yw eich hawliau.

Polisi “Dim Archeb Prynu, Dim Tâl”

Dim ond anfonebau sy’n cynnwys rhif archeb prynu (PO) dilys gan y Coleg y gallwn eu talu. Sicrhewch fod gennych rif PO cyn darparu unrhyw nwyddau neu wasanaethau, a’i gynnwys ar eich anfoneb.
Defnyddiwch rif PO yr archeb benodol honno, nid rhif o archeb flaenorol. Bydd hyn yn ein helpu i brosesu eich taliad mor gyflym â phosibl.

Sut olwg sydd ar rif archeb prynu?

Mae rhif archeb prynu (PO) dilys y Coleg yn cynnwys wyth digid. Beth fydd yn digwydd i’m hanfoneb os na fyddaf yn nodi rhif archeb brynu dilys? Byddwn yn dychwelyd yr anfoneb atoch ac yn gofyn i chi sicrhau rhif PO dilys. Dim ond pan fyddwn wedi derbyn anfoneb ddilys sy’n cynnwys rhif PO dilys y bydd ein cyfnod talu yn dechrau, felly bydd eich taliad yn cael ei ohirio. Beth yw telerau talu’r Coleg? Ein telerau talu safonol yw 30 diwrnod o ddyddiad derbyn anfoneb gywir nad yw’n destun anghydfod, oni bai y cytunir fel arall. Beth yw dull talu’r Coleg? Telir pob taliad drwy BACS. Er mwyn amddiffyn chi a’r Coleg rhag twyll, ni fyddwn byth yn newid manylion banc cyflenwr ar sail e-bost neu alwad ffôn yn unig. Rydym yn gwirio pob cais i newid manylion yn annibynnol, gan ddefnyddio’r manylion cyswllt sydd eisoes gennym, cyn i’r newid ddod i rym.

Os byddwch yn derbyn cais amheus sy’n ymddangos fel pe bai’n dod gan y Coleg, cysylltwch â Payments@cymoedd.ac.uk.

Sut i dendro

Cyhoeddir ein cyfleoedd contract ar GwerthwchiGymru (Sell2Wales). Mae pob hysbysiad cyfle yn egluro sut i gael mynediad at y dogfennau tendro a sut i gyflwyno eich ymateb.

Ers 24 Chwefror 2025, mae’r rhan fwyaf o gaffael cyhoeddus yng Nghymru wedi cael ei gynnal o dan Ddeddf Caffael 2023. I gyflwyno tendr ar gyfer contractau a hysbysebir o dan y Ddeddf, mae angen i chi:

Gofrestru ar Lwyfan Digidol Canolog Llywodraeth y DU a chael eich dynodwr cyflenwr unigryw.
Cwblhau eich gwybodaeth graidd fel cyflenwr ar y Llwyfan Digidol Canolog.
Ychwanegu eich dynodwr cyflenwr unigryw at eich proffil GwerthwchiGymru (Sell2Wales).

Os ydych yn newydd i GwerthwchiGymru (Sell2Wales), bydd angen eich dynodwr cyflenwr unigryw arnoch cyn y gallwch gofrestru. Mae GwerthwchiGymru yn darparu canllawiau cam wrth gam i gyflenwyr.

Os ydych yn newydd i dendro yn y sector cyhoeddus, mae Busnes Cymru yn cynnig cyngor a chymorth am ddim.