Myfyrwyr Dylunio Gwisgoedd a Chelf a Dylunio yn Arddangos Creadigaethau Laura Ashley yn ystod Ymweliad Brenhinol

Cafodd myfyrwyr gradd sylfaen mewn Dylunio Gwisgoedd a Lefel 3 mewn Celf a Dylunio yng Ngholeg y Cymoedd gyfle cofiadwy yr wythnos hon wrth iddynt gyflwyno eu gwaith i’r Brenin Siarl III a’r Frenhines Camilla yn ystod ymweliad Brenhinol â Chastell Cyfarthfa, Merthyr Tudful.

Mae’r myfyrwyr wedi bod yn ymchwilio i waith Laura Ashley fel rhan o’r dathliadau canmlwyddiant sy’n nodi 100 mlynedd ers ei geni.

Wrth siarad am y prosiect, dywedodd un dysgwr: “Cymerodd risg fawr wrth adeiladu ei busnes ac wrth symud ei theulu yn ôl i Gymru. Roedd hi’n mynd ar drywydd breuddwyd a gwireddodd y freuddwyd honno ar raddfa enfawr. Mae’n ysbrydoledig iawn.”

Nododd un arall bwysigrwydd effaith Ashley ar fenywod mewn ffasiwn: “Roedd hi’n gwthio menywod ymlaen yn y diwydiant ac yn creu gwaith a oedd yn cynrychioli ei hunaniaeth fel menyw o Gymru. Mae hynny’n bwysig. Dyma’r hyn y dylai mwy o fenywod deimlo’n hyderus yn ei wneud.”

“Fe wnes i fwynhau gwneud fy mhatrwm fy hun ac argraffu sgrin – roedd yn teimlo’n driw iawn i broses Laura Ashley.”

Wrth siarad am y profiad, tynnodd staff y rhaglen, Esme Cowan a Callan Matthews, sylw at bwysigrwydd cyfleoedd sy’n caniatáu i fyfyrwyr ymgysylltu’n uniongyrchol â lleoliadau treftadaeth ddiwylliannol a’r diwydiant creadigol. Nodwyd bod prosiectau fel hyn yn annog dysgwyr i ddatblygu eu sgiliau technegol a magu hyder wrth gyflwyno eu gwaith i gynulleidfaoedd amrywiol.

“Mae gweithio ar y prosiect hwn wedi rhoi cipolwg ystyrlon i’n dysgwyr ar realiti cynhyrchu gwisgoedd – o ymchwil a thorri patrymau i lunio gwisgoedd terfynol. Mae gallu rhannu’r gwaith hwnnw yn ystod ymweliad Brenhinol yn rhywbeth arbennig iawn, ac rydyn ni’n hynod falch o’r proffesiynoldeb a’r creadigrwydd maen nhw wedi’u dangos drwy’r amser.”

Bydd eu dillad yn parhau i ymddangos mewn digwyddiadau canmlwyddiant i ddathlu etifeddiaeth Laura Ashley yng Nghymru a thu hwnt.

Share!