Dysgwr Plymio Coleg y Cymoedd yn Parhau i Ddisgleirio gyda Chydnabyddiaeth Genedlaethol

8 Mehefin 2026

Mae ein dysgwr Plymio a Gwresogi Lefel 3 Daniel Roberts yn parhau i gael effaith anhygoel ar ôl taith arbennig ers dechrau yn y coleg yn 2024.

Gan ddechrau fel dysgwr Plymio Sylfaen ar ein campws yn Ystrad Mynach, mae Dan wedi mynd o nerth i nerth drwy ei ymroddiad, ei waith caled a’i angerdd dros y diwydiant. Yn ystod y flwyddyn ddiwethaf, mae wedi sicrhau llwyddiant mewn cystadlaethau, wedi ennill cydnabyddiaeth genedlaethol ac erbyn hyn wedi ennill gwahoddiad i ymuno â thîm mawreddog Back to Basics Squad UK.

Gan ychwanegu cyflawniad mawr arall at ei restr gynyddol o anrhydeddau, mae Dan hefyd wedi cael ei enwi’n ‘Dysgwr y Flwyddyn Cylchgrawn HIP 2026’; cyflawniad gwych sy’n tynnu sylw ei dalent a’i ymrwymiad i’r grefft.

Drwy’r profiad diwydiant amhrisiadwy a gafwyd drwy gymryd rhan mewn cystadlaethau cenedlaethol, ynghyd â’i etheg gwaith cryf a’i angerdd dros blymio, mae Dan wedi sicrhau prentisiaeth gyda Gibson Technical Services. Mae hyn yn nodi cam nesaf cyffrous yn ei yrfa a chyflawniad gwych ar gyfer ei ddyfodol yn y diwydiant.

Canmolodd tiwtor Dan a Phencampwr Sgiliau yng Ngholeg y Cymoedd, Lee Perry, ei gyflawniadau gan hefyd annog mwy o ddysgwyr i gymryd rhan mewn cystadlaethau sgiliau.

“Mae Dan yn enghraifft berffaith o sut gall cystadlaethau gyfoethogi a gwella eich profiad dysgu. Rydym mor falch o sut mae Dan wedi ymroi gyda phroffesiynoldeb, sgil a phenderfyniad.”

Ychwanegodd Lee hefyd:

“Nid yw cystadlaethau sgiliau yn ymwneud ag ennill medalau yn unig; maen nhw’n ymwneud â darganfod potensial, codi safonau a chreu cyfleoedd ar gyfer twf personol. Byddwn yn annog unrhyw un sy’n ystyried cymryd rhan i gymryd y cam cyntaf hwnnw —gall y profiad, y cysylltiadau a’r hyder a geir newid bywyd unigolyn.”

Mae pob un ohonom yng Ngholeg y Cymoedd yn hynod falch o gyflawniadau Dan hyd yn hyn ac yn edrych ymlaen at weld beth sydd gan y dyfodol i’w gynnig wrth i’w daith barhau.

Mae ceisiadau i astudio Plymio a chyrsiau eraill sy’n gysylltiedig ag Adeiladwaith ym mis Medi nawr ar agor.

Darganfyddwch fwy am Gystadlaethau Sgiliau yng Ngholeg y Cymoedd.