Mae dysgwr Trin Gwallt Lefel 1, Debbie Walters, wedi ymuno â thîm o Asiantau Entrepreneuriaeth Ieuenctid Syniadau Mawr Cymru er mwy bod yn llefarydd ar ran y rhai sy’n breuddwydio am fod yn fos arnyn nhw eu hunain.

Mae Syniadau Mawr Cymru yn awyddus i recriwtio tîm gwirfoddol o Asiantau Entrepreneuriaeth Ieuenctid i gynrychioli ‘llais ieuenctid entrepreneuriaeth yng Nghymru’. Dyna nod a rennir gan Dîm Dyfodol@Cymoedd Coleg y Cymoedd, sy’n cynnal yr Hwb Menter a Chyflogadwyedd; ‘siop un stop’ ar gyfer mentora, arweiniad, hyfforddiant, a rhwydwaith mewnol i ddysgwyr ar draws y pedwar campws.

Er nad oedd hi eisoes wedi ystyried cychwyn ei busnes ei hun, ar ôl dysgu am y rhaglen ymgeisodd Debbie am le arni a gofynnwyd iddi fod yn Asiant Entrepreneuriaeth Ieuenctid. Bwrodd ati’n syth a dechreuodd gymryd rhan mewn trafodaethau grŵp yn casglu barn darpar entrepreneuriaid ifanc ledled Cymru.

Meddai Debbie: “Fe wnes i gais i fod yn Asiant Entrepreneuriaeth Ieuenctid oherwydd roeddwn i am wneud rhywbeth newydd a oedd yn wahanol i fy nghwrs Trin Gwallt. Ar ôl dysgu am y rôl ar yr Hwb Menter a Chyflogadwyedd, roedd yn swnio fel cyfle gwych i wthio fy hun a magu hyder.

“Roedd Lesley o Dîm y Dyfodol yn fwy na pharod i fy nghefnogi yn fy nghais ac fe wnaeth hi fy annog drwy gydol y broses er gwaethaf fy nerfau.”

Fel Asiant Entrepreneuriaeth Ieuenctid, mae cyfranogwyr fel Debbie yn elwa o gael profiad gwaith gwerthfawr, ymuno â rhwydwaith o unigolion o’r un anian ledled Cymru, a chael mynediad at ddosbarthiadau meistr unigryw gydag arbenigwyr ac entrepreneuriaid blaenllaw. Drwy gyfres o drafodaethau, mae cyfranogwyr 16 – 25 oed ledled Cymru yn cyfrannu at lywio penderfyniadau ar gyfer dyfodol entrepreneuriaeth ieuenctid.

Ychwanegodd Debbie: “Fe wnaeth y trafodaethau fy ngalluogi i rannu fy marn gyda phobl newydd, darganfod modelau rôl entrepreneuriaeth ieuenctid, a chwrdd â gwesteion arbennig sy’n gwneud pethau anhygoel yn eu diwydiant.

“Roeddwn i’n teimlo’n nerfus iawn ar y dechrau. Doeddwn i erioed ymgymryd â rôl fel hon o’r blaen, ond gadewais i’r cyfarfod cyntaf yn llawn cyffro ac yn barod am fwy. Roedd yn deimlad gwych gallu bod yn rhan o dîm o bobl sy’n gweithio i helpu pobl ifanc i gyflawni eu breuddwydion. Ers hynny, rydw i wedi ystyried cychwyn fy musnes fy hun yn y dyfodol, sy’n rhywbeth nad oeddwn i erioed wedi ei ystyried o’r blaen.

Mae gwasanaeth entrepreneuriaeth ieuenctid Syniadau Mawr Cymru yn rhan o Busnes Cymru ac fe’i hariennir yn rhannol gan Gronfa Datblygu Rhanbarthol Ewrop drwy Lywodraeth Cymru. Mae’r gwasanaeth wedi’i anelu at unrhyw un rhwng 5 a 25 oed sydd am ddatblygu syniad busnes. O fŵtcamps i weithdai, mae pobl ifanc sy’n ystyried entrepreneuriaeth yn cael cyngor ac adnoddau gwerthfawr ar sut i roi hwb i’w busnes eu hunain.

Gan weithio’n agos gyda Syniadau Mawr Cymru, mae Tîm Dyfodol@Cymoedd Coleg y Cymoedd yn sicrhau bod gan ddysgwyr sy’n ystyried hunangyflogaeth fynediad at adnoddau i gryfhau eu nodau busnes. Mae’r Tîm Dyfodol@Cymoedd hefyd yn gweithio i gynnig cyfleoedd i ddysgwyr sydd am archwilio opsiynau gyrfa a datblygu eu dyheadau busnes a phersonol.

Dywedodd Rheolwr Menter, Sgiliau a Chyflogadwyedd Coleg y Cymoedd, Lesley Cottrell: “Fy nod fy hun a nod tîm Dyfodol@Cymoedd yw cynnig y gefnogaeth sydd ei hangen ar ddysgwyr ar draws y coleg i ddatblygu eu sgiliau personol a’u hyder. Drwy gyfleoedd fel menter wirfoddol Asiantau Entrepreneuriaeth Ieuenctid Syniadau Mawr Cymru, mae dysgwyr fel Debbie yn gallu elwa o brofiadau newydd a all roi hwb i’w datblygiad personol a gyrfaol.

“Rydw i mor falch o Debbie am fentro gwneud cais fel Asiant Entrepreneuriaeth Ieuenctid a gwthio ei hun i fod yn rhan o gyfle mor gyffrous. Byddwn ni’n parhau i’w chefnogi yn ei gyrfa a’i thaith bersonol, ac rydym ni’n edrych ymlaen at ei gweld yn magu hyder hyd yn oed ymhellach.”

“

Mae dysgwr coleg o Dde Cymru wedi defnyddio’r cyfnod clo fel cyfle i gychwyn ei fusnes ei hun a dilyn ei freuddwyd o fod yn berchen ar ei stiwdio ffotograffiaeth ei hun.

Mae Euan Balman, sy’n ddeunaw oed ac yn dod o Lantrisant, ar fin agor ei stiwdio ei hun yr haf hwn, ar ôl treulio’r pum mis diwethaf yn adnewyddu gweithdy gwag yn ei dref enedigol.

Mae Euan, sydd ar hyn o bryd yn astudio cymhwyster Technoleg Cyfryngau Creadigol Lefel 3 yng Ngholeg y Cymoedd, wedi bod yn angerddol am ffotograffiaeth byth ers iddo gael camera digidol fel anrheg ar ei ben-blwydd yn wyth oed. Ers hynny, mae Euan wedi parhau i ddatblygu ei sgiliau ac wedi treulio oriau di-ri yn tynnu lluniau o dirweddau Cymru.

Ar ôl derbyn ei gomisiwn cyntaf un yn ddiweddar am ddelwedd o fachlud haul dros hen dref Llantrisant, cafodd Euan ei ysbrydoli i ddilyn ei nod o fod yn ffotograffydd proffesiynol a chynnal ei arddangosfa ei hun i arddangos ei waith.

Mae’r llanc talentog wedi dewis peidio â mynd i’r brifysgol, gan ddewis yn hytrach ymuno â’i fam Delyth, a gafodd ei diswyddo o’i swydd ym myd addysg yn ystod y pandemig, a sefydlu busnes teuluol newydd, ‘MADEcreative’.

Derbyniodd y teulu Grant Rhwystrau Busnes Cymru i helpu i gychwyn y busnes ac maent wedi bod yn brysur yn ystod y pum mis diwethaf yn datblygu’r gofod stiwdio newydd, a leolir yn yr hen Model House yng nghanol tref Llantrisant, gydag Euan yn mynd i’r afael â’r adnewyddu ei hun i gwtogi ar gostau.

Yn ogystal â chynnal arddangosfa barhaol i arddangos a gwerthu ei waith, bydd Euan hefyd yn cynnig ystod o wasanaethau ffotograffiaeth yn y stiwdio gan gynnwys comisiynau preifat, portreadau teulu a gwasanaethau cynnyrch a marchnata ar gyfer cleientiaid masnachol, tra bydd Delyth yn goruchwylio rhedeg y busnes.

Gyda’r newidiadau olaf yn cael eu gwneud i’r gofod newydd, mae disgwyl i’r stiwdio agor ddiwedd mis Mehefin unwaith y bydd Euan wedi gorffen yn y coleg.

Meddai Euan: “Rydw i wedi bod wrth fy modd â ffotograffiaeth cyhyd ag y gallaf gofio, yn enwedig lluniau tirlun, ac roedd gennyf ormod o ddewis yn byw yng Nghymru gyda chymaint o leoedd hardd o’m cwmpas i dynnu eu llun. Roeddwn i’n gwybod fy mod am ddilyn gyrfa mewn ffotograffiaeth a chael fy stiwdio fy hun fu’r freuddwyd erioed.

“Oherwydd Covid, dydw i ddim wedi cael y cyfle i arddangos fy ngwaith felly rydw i’n edrych ymlaen at allu cynnal arddangosfa o’r diwedd. Rydw i mor gyffrous i agor fy stiwdio fy hun ac i groesawu fy nghleientiaid cyntaf – mae hi wedi bod mor werth chweil gweld popeth yn dod at ei gilydd dros yr ychydig fisoedd diwethaf. Bydd y flwyddyn nesaf yn un enfawr i mi wrth imi ddechrau fy ngyrfa ac ni allaf aros i weld lle aiff hynny â mi. Rydw i mor ddiolchgar i bawb sydd wedi helpu i wneud hyn yn bosibl gan gynnwys fy nhiwtoriaid yn y coleg, y tîm yn Syniadau Mawr Cymru a fy mam am gefnogi fy syniad.

Mae Euan wedi derbyn cefnogaeth i gychwyn y fenter gan Syniadau Mawr Cymru – gwasanaeth entrepreneuriaeth ieuenctid Busnes Cymru – sydd wedi’i anelu at unrhyw un rhwng 5 a 25 oed sydd am ddatblygu syniad busnes. Rhoes y gwasanaeth fentoriaeth i Euan a’i gynorthwyo i ddatblygu cynllun busnes a gyflwynwyd i Fusnes Cymru i’w ariannu.

Mae tîm y Dyfodol Coleg y Cymoedd, sydd wedi ymrwymo i helpu dysgwyr yn y coleg i ddod â syniadau busnes yn fyw, hefyd wedi helpu Euan i sefydlu ei fusnes ei hun wrth iddo gwblhau ei astudiaethau coleg. Mae’r tîm wedi helpu i’w gysylltu â phartneriaid yn y diwydiant ac wedi cefnogi’r broses gyfan.

Dywedodd Lesley Cottrell, Rheolwr Menter, Sgiliau a Chyflogadwyedd yng Ngholeg y Cymoedd: “Mae sgil ac angerdd amlwg Euan dros ffotograffiaeth, ynghyd â’i ymdrech glir i gychwyn ei fusnes ei hun, wedi bod yn hynod drawiadol ac rydym ni’n falch o gael Euan fel un o’n dysgwyr yn y coleg.

“Rydym ni’n falch ein bod wedi ei helpu yn ei daith ac yn dymuno’r gorau iddo gyda’i fenter newydd.”

“

Mae Coleg y Cymoedd yn helpu i wyrdroi dirywiad natur diolch i gynllun gardd newydd gan yr elusen amgylcheddol Cadwch Gymru’n Daclus.

Mae ‘Lleoedd Lleol ar gyfer Natur’ yn cynnig pecynnau am ddim i gymunedau sy’n cynnwys yr holl blanhigion, offer a deunyddiau sydd eu hangen i greu gerddi bach.

Bydd yr Adran Mynediad Galwedigaethol yng Ngholeg y Cymoedd yn creu gardd bywyd gwyllt ac yn tyfu ffrwythau ar eu campws y Rhondda.

Dywedodd Dorian Adkins – Cydlynydd Campws yr Ysgol Mynediad Galwedigaethol: “Bydd y fenter hon yn cael effaith wych ar ein dysgwyr, a fydd yn defnyddio’r ardal i gymryd rhan mewn gweithgareddau garddio a phrofiad gwaith ac yn dechrau tyfu eu ffrwythau a’u llysiau eu hunain.”

Dywedodd Dirprwy Brif Weithredwr Cadwch Gymru’n Daclus, Louise Tambini: “Yn fwy nag erioed, mae pobl yn cydnabod gwerth natur i iechyd a lles ein cymunedau. Rydym ni’n falch iawn bod sefydliadau, fel Coleg y Cymoedd, bellach yn cael y cyfle i wneud gwir wahaniaeth drwy Leoedd Lleol ar gyfer Natur. Rydym ni’n gwybod bod llawer o ardaloedd eraill a allai elwa o’r cynllun ac rydym ni’n annog pobl i gymryd rhan tra bydd pecynnau am ddim ar gael.”

Mae’r fenter yn rhan o gronfa ehangach ‘Lleoedd Lleol ar gyfer Natur’ Llywodraeth Cymru sydd wedi ymrwymo i gaffael, adfer a gwella natur ‘ar eich stepen drws’.

Mae pecynnau ar gael o hyd i grwpiau a sefydliadau cymunedol. I wneud cais am Leoedd Naturiol ar gyfer Natur, ewch i https://www.keepwalestidy.cymru/Pages/Site/cy/Category/natur

“