Bydd unarddeg yn cystadlu am deitl Cogydd Iau Cymru a gwobr wych pan gynhelir dwy rownd gyn-derfynol ranbarthol y mis hwn.

Cynhelir rownd De Cymru yng Ngholeg y Cymoedd, Nantgarw, Ionawr 14, pan fydd pum cogydd yn cystadlu yn cynnwys dau o ddysgwyr Coleg y Cymoedd a fydd yn cystadlu yn erbyn cogyddion sydd eisoes yn gweithio mewn bwytai a gwestai adnabyddus.

Ar wahân i’r bri o fod yn gogydd ifanc gorau Cymru, bydd y pencampwr hefyd yn ennill taith i ddinas Athen i gynrychioli Cymru yn Fforwm Iau Cynhadledd Cymdeithas y Byd o Gymdeithasau’r Cogyddion ym mis Mai 2016,

Bydd enillwyr pob rownd ynghyd â dau a gafodd y sgôr uchaf o blith y rhai ddaeth yn agos yn mynd ymlaen i gystadlu yn y rownd derfynol a gynhelir yng Ngholeg Llandrillo ar Chwefror 16, diwrnod cyn Pencampwriaethau Coginio Rhyngwladol Cymru.

Trefnir cystadleuaeth Cogydd Iau Cymru bob dwy flynedd gan Gymdeithas Goginio Cymru ac mae’n cael ei noddi gan Lywodraeth Cymru i hyrwyddo’r brand Bwyd a Diod o Gymru (Food and Drink Wales).

Gofynnwyd i’r cogyddion gyflwyno eu bwydlen greadigol eu hunain ar gyfer cinio tri chwrs i bedwar o bobl, gan ddefnyddio detholiad o gynhyrchion Cymru. O’r ffurflenni cais a’r bwydlenni, dewisodd panel o feirniaid profiadol yr ymgeiswyr gorau i gystadlu yn y rowndiau terfynol rhanbarthol lle byddan nhw’n cael tair awr i baratoi eu prydau.

Cystadleuwyr rownd De Cymru ydy: Ian McCormack a Wensley Macauly o Goleg y Cymoedd ynghyd â Benjamin Cooke o Brains, Caerdydd, Andrew Tabberner o Fwyty’r Coast, Saundersfoot, a Vivienne Read o Westy’r Celtic Manor, Casnewydd.

Dyweoddd Colin Gray, Llywydd Cymdeithas Goginio Cymru a pherchennog Capital Cuisine, ei fod wrth ei fodd gyda nifer yr ymgeiswyr eleni ac yn edrych ymlaen at gystadleuaeth agos yn y rowndiau cyn-derfynol.

Eglurodd y gallai’r gystadleuaeth fod yn gam ar y ffordd i ymuno â Thîm Coginio Iau Cymru yn y dyfodol.

“Mae cystadleuaeth Cogydd Iau Cymru yn llwyfan perffaith i gogyddion ifanc arddangos eu sgiliau a dal llygad dewiswyr y tîm cenedlaethol,” ychwanegodd. “Mae enillwyr blaenorol wedi mynd ymlaen i gystadlu dros Gymru ymhob cystadleuaeth goginio bwysig o gwmpas y byd.

“Er enghraifft, enillydd Cogydd Iau Cymru 2013, oedd Chris Tull, a fe oedd capten Tîm Coginio Iau Cymru yng nghystadleuaeth Cwpan Coginio’r Byd yn Luxembourg lle enillon nhw fedalau arian ac efydd .”

Cychwynnwyd ar y broses o chwilio am sêr coginio’r dyfodol gyda rownd gyn-derfynol Gogledd Cymru yng Ngholeg Llandrillo, Llandrillo-yn-Rhos, lle bu chwe chogydd yn cystadlu am le yn y rownd derfynol.

Dyma’r rhai fydd yn cystadlu yn rownd Gogledd Cymru: Arron Tye o Shared Olive, Penarlâg, Mathew Morris o Bar Uno, Prifysgol Bangor, Joshua Hughes o Westy’r Quay, Deganwy, Sam Ricketts o Fwyty Signatures, Conwy, James Roberts o Westy Ty Gwyn, Betws y Coed a Ryan Philipps o Westy’r Castell, Conwy.

“

Daeth llu o wobrau i ddysgwyr a staff Coleg y Cymoedd wrth i 2014 dynnu i’w therfyn, a hynny ar draws adrannau academaidd a galwedigaethol.

Mae’r coleg, gyda’i 3000 o ddysgwyr mewn pum campws ym Mwrdeistrefi Rhondda Cynon Taf a Caerffili, yn dathlu ennill gwobrau cenedlaethol gan yr adrannau peirianneg, trin gwallt a harddwch, academaidd a Lefel A.

Mae CBAC wedi rhoi achos arbennig i’r coleg ddathlu, wrth i’r bwrdd arholi gyhoeddi bod un o’r dysgwyr wedi ei dewis fel Dysgwraig y Flwyddyn Lefel 1 Bagloriaeth Cymru.

Mae Dion Newtown, 18, o Gwm Clydach, ar hyn o bryd yn gweithio ar ei Bagloriaeth Cymru fel rhan o’i sgiliau ar gyfer y cwrs astudiaethau pellach ar Gampws Rhondda y coleg. Yn ogystal â’i gwaith coleg, teithiodd Dion i wlad Cambodia yn gynharach yn y flwyddyn i wneud gwaith gwirfoddol gyda’r Gwasanaethau Gwirfoddol Dramor (VSO).

Mae CBAC hefyd wedi cyhoeddi mai cyn-ddysgwraig Lefel A o Goleg y Cymoedd, Shannon Britain, oedd wedi sgorio’r marc uchaf yn Y Gyfraith lefel A drwy Gymru a Lloegr gyfan eleni. Cafodd Shannon farciau llawn yn ei harholiad ar y gyfraith, a golygodd ei graddau A*, A* A (yn Lefel A, Y Gyfraith, Llên Saesneg a Hanes) iddi gael lle i astudio Llên Saesneg ym Mhrifysgol Rhydychen.

Ac yn Ffeinal Sgiliau Byd-eang ‘WorldSkills’ 2014 trechodd Ashleigh Simmons, dysgwraig trin gwallt a harddwch ar gampws Nantgarw, dros 300 o rai eraill i dderbyn gwobr efydd a chyfle i hyfforddi gyda Sgwad Trin Gwallt Prydain. Yn ystod yr achlysur, enillodd Ashleigh y wobr ym Mhencampwriaethau Cenedlaethol Cymru, gyda’i chyd-ddysgwraig ar yr un cwrs, Bethan Walters, yn cael y drydedd wobr.

Mae tîm peirianneg o goleg Nantgarw wedi eu cadarnhau fel Tîm Addysg Bellach y Flwyddyn y DU yng Ngwobrau blynyddol Dysgu y ‘Pearson Teaching Awards’.

Derbyniodd y tîm o 28 o’r adran y wobr arian i gydnabod yr arbenigedd sydd yno ym meysydd awyrofod, peirianneg trydanol a mecanyddol a’u dyfalbarhad i fod y darparydd hyfforddiant prentisiaid gorau yng Nghymru.”

Wrth drafod y gwobrau, dywedodd Judith Evans, pennaeth Coleg y Cymoedd:

“Mae ein coleg i gyd yn cyd-lawenhau yn y casgliad o wobrau ddaeth i’n rhan. Mae’r cydnabyddiaethau hyn yn ddiwedd perffaith i flwyddyn eithriadol i Goleg y Cymoedd ac yn arwydd o ddyfalbarhad a gwaith caled ein dysgwyr a’n staff addysgu.

“Ar ran y coleg i gyd, rydw i’n llongyfarch Dion, Shannon, Bethan ac Ashleigh. Mae’r llwyddiannau hyn yn wobrau teilwng i’w ymroddiad dros eu datblygiad personol ac rwy’n siwr bydd llawer yn eu dilyn yn y dyfodol agos.

“Rydyn ni hefyd yn llongyfarch ein hadran beirianneg am eu camp eithriadol yng ngwobrau’r Pearson Awards. Mae arweinyddiaeth a staff yr adran yn esiampl o ymrwymiad i’r trylwyredd addysgol sy’n bodoli drwy bob un campws yn y coleg.

“Wrth i ni edrych ymlaen i’r Flwyddyn Newydd, fe hoffwn i ddiolch i’n holl ddysgwyr, staff a phartneriaid corfforaethol, am eu hymdrechion ar y cyd i sicrhau bod ein coleg yn parhau i lwyddo yn ei genhadaeth i gryfhau cymunedau De Cymru drwy waith addysgol ardderchog a hyfforddiant galwedigaethol gwych.”

“

Mae merch ifanc o Dde Cymru wedi cael cyfle i wella’i gwybodaeth a’i sgiliau drwy gael cyd-weithio ag enillydd Gwobr Nobel.

Roedd Chloe Brind, 18 o’r Bargod, dysgwraig yng Ngholeg y Cymoedd, yn un o 68 o bobl o Gymru gyfan fu’n rhan o brosiect Ymchwil Nuffield eleni. Cafodd yr ymchwil arbennig ym maes gwyddoniaeth Chloe ei gefnogi gan Amgueddfa Genedlaethol Cymru yn yr Adran Bioamrywiaeth a Bioleg Systematig, lle roedd Chloe yn gorffen ei lleoliad ar y pryd.

Bob blwyddyn, mae Lleoliadau Ymchwil Nufield yn darparu cyfle i ddysgwyr gael gweithio ochr yn ochr â gwyddonwyr, technolegwyr, peirianwyr a mathemategwyr, a hynny ar hyd a lled prifysgolion y DU, cwmnïau masnachol, mudiadau gwirfoddol a sefydliadau ymchwil.

Nod prosiect ymchwil Chloe oedd edrych ar nodweddion ffisegol a gwahaniaethau genetig rhwng dau fath o lygwn. Yn arwyddocaol, yn ystod ei hymchwil, canfuwyd nodweddion newydd a rhagor o wahaniaethau rhwng y ddau fath lygwn nad oedd wedi eu canfod o’r blaen. Roedd yr Amgueddfa’n canfod yr ymchwil yn fuddiol iawn, gan ei gwneud yn haws i wahaniaethu rhwng y ddwy rywogaeth o’r abwyd du.

Yn ystod ei chyfnod ar leoliad, cafodd Chloe gyfarfod â chyn enillydd Gwobr Nobel, Yr Athro Syr Martin Evans, sy’n gweithio ym Mhrifysgol Caerdydd, a bu’n trafod gwahanol agweddau o brosiect Chloe gyda hi.

Meddai Chloe: “Roedd y lleoliad Ymchwil Nuffield yn brofiad gwir werthfawr a bu’n ffantastig cael cydweithio â gwyddonwyr blaenllaw yn eu meysydd arbenigol.

“Roedd fy nhasg ymchwil yn ddiddorol iawn a bu’n help i mi benderfynu mai dyma’r yrfa rydw i am ei dilyn.

Fel rhan o’r cynllun, gwahoddwyd y rhai oedd yn cymryd rhan i adeilad Techniquest ym Mae Caerdydd i arddangos canlyniadau eu hymchwil. Y gobaith ydy y bydd y lleoliad gydag Amgueddfa Genedlaethol Cymru yn sicrhau lle i Chloe ym Mhrifysgol Birmingham unwaith bydd hi wedi cwblhau ei Lefel A ym Mehefin.

Dywedodd Ian Rees, Pennaeth y Ganolfan Chweched Dosbarth benodol ar gampws Nantgarw, am lwyddiant Chloe: “Rydyn ni’n ymfalchïo a llawenhau bod Chloe wedi ei dewis i gael y cyfle i fod yn rhan o leoliadau ymchwil mawreddog Nuffield ac yn mawr obeithio bydd hyn yn arwain i ragor o lwyddiannau yn ei harholiadau a’i gyrfa yn ei dewis faes, Gwyddoniaeth.”

“

Bu grŵp o ddysgwyr Coleg y Cymoedd yn Ystrad Mynach mewn gweithdy diweddar gan Fixers, sefydliad lle mae pobl ifanc yn defnyddio’u gorffennol i sefydlu eu dyfodol. Mae’r bobl hyn wedi eu hysgogi gan brofiad personol i wneud newid positif iddyn nhw eu hunain ac i eraill o’u cwmpas.

Gwahoddwyd y deg dysgwr sy’n astudio Gweinyddu Busnes Lefel 3 a Hanfodion Swyddfa gydag Astudiaethau Paragyfreithiol i fod yn rhan o’r achlysur, lle roedd Shauna Pugh, 21 oed, yn cyflwyno sesiwn, gan fanylu am ei chyflwr o Amnesia Datgysylltiol. Eglurodd ei phrofiadau a’i theimladau wrth ymdopi â’r cyflwr a thrwy gyfres o weithgareddau a thrafodaethau, bu’n ymglymu â’r dysgwyr. Bu Shauna’n rhannu ei gobeithion am astudio mewn prifysgol ac yna, yn 18 oed, tra’n astudio am ei Lefel A, cafodd ddiagnosis bod ganddi Amnesia Datgysylltiol. Er gwaetha’i phrofiadau, mae hi’n dal i obeithio addysgu ei hun ymhellach rhywdro yn y dyfodol.

Roedd y gweithdy’n fuddiol i’r 10 dysgwr, gafodd olwg pellach ar y cyflwr hynod brin hwn. Dywedodd Shannon Kinsey, 17 oed, o’r cwrs Gweinyddu Busnes Lefel 3: Mi wnes i wir fwynhau’r sesiwn. Mae Shauna’n ysbrydoliaeth, mae ganddi agwedd mor bositif ac mae’n awyddus i anfon neges clir allan, yn arbennig i bobl ifanc. Gall salwch meddwl effeithio ar rai o bob oedran ond mae ‘na bod amser rhywun ar gael i’ch helpu, i’ch cynorthwyo ac i ofalu amdanoch chi.”

Cafodd y gweithdy ei ffilmio gan ITV a bydd yn cael ei ddarlledu ym mis Chwefror 2015: http://www.fixers.org.uk/news/11171-11208/memory-loss-fix-on-itv.php

“

Wrth i dymor y pantomeimiau gychwyn, mae dau o diwtoriaid Coleg y Cymoedd yn chwarae rhan flaenllaw i sicrhau bydd pantomeim Jac a’r Goeden Ffa yn Rhondda Cynon Taf eleni cystal â’r blynyddoedd blaenorol.

Mae sgiliau’r ddau diwtor, Caroline Thomas a Richard Embling, wedi bod yn amlwg yng nghynyrchiadau’r gorffennol ac fe’i gwahoddwyd gan Theatr Rhondda Cynon Taf i gyfrannu eto eleni. Mae’r ddau’n gobeithio ychwanegu’r swyn ychwanegol hwnnw i wneud y cyfan yn sioe deuluol lwyddiannus.

Mae Caroline wedi bod yn arwain y cwrs Gradd Sylfaen a B.A. (Anrh) mewn Creu Gwisgoedd i’r Sgrin a’r Llwyfan yng Ngholeg y Cymoedd ers 2010 ac mae ganddi dros 20 mlynedd o brofiad, gan weithio’n bennaf ym maes gwisgoedd ar gyfer y theatr.

Gyda’i harbenigedd o dorri patrymau a chreu gwisgoedd bu’n Uwch Wisg Feistres yng Nghwmni Opera Cenedlaethol Cymru, ac yn gweithio mewn theatrau rhanbarthol gan gynnwys y Bristol Old Vic a Theatr Clwyd.

Mae Caroline hefyd yn gyfarwydd â gwaith teledu a’r sgrin fawr, gan greu gwisgoedd i ffilmiau megis ‘Robin Hood Prince of Thieves’ ac, yn fwy diweddar, cyfres deledu Dr Who.

Ymunodd 2012 Richard â’r tîm yng Ngholeg y Cymoedd fel darlithydd ym maes creu celfi ar y cwrs HND Celf Creadigol Cynyrchiadau, gan arbenigo mewn gwneud celfi, creu cast a mowld cyrff ar gyfer cymeriadau.

Graddiodd Richard gyda B.A. (Anrh) Creu Modelau ar gyfer Dylunio a’r Cyfryngau o Sefydliad Celf Bournemouth yn 2006 a bu’n gweithio ar nifer fawr o gynyrchiadau byw yn y diwydiant fel gwneuthurwr gwisgoedd, pypedau a chelfi mân.

Mae wedi gweithio gyda chwmnïau enwog megis Cwmni Opera Cenedlaethol Cymru yn creu props gwisgoedd i’w prif gynhyrchiad o ‘Cosi Fan Tutte’ yn 2012 ac i gwmni’r Royal Opera House, Covent Garden, Undeb Rygbi Cymru a mordeithiau pleser P&O.

Dyma’r pedwerydd tro i fyfyrwyr sydd ar y cwrs Gradd Sylfaen a gradd B.A. (Anrh) Creu Gwisgoedd i Sgrin a Llwyfan fod yn ymwneud â’r pantomeim. Ers mis Medi mae dysgwyr ar eu hail flwyddyn wedi bod yn gweithio’n ddiflino, gan gadw i ddedlein caeth i ddarparu detholiad eang o wisgoedd syfrdanol i’r cast, gan gynnwys rhai Jac, Dame Trott, Fleshcreep, Fairy Flora, Princess Crumble ac Utterly a Butterly.

Dywedodd un o’r dysgwyr, Amy Jones: “Mae cynhyrchu’r gwisgoedd ar gyfer y pantomeim, a hynny i ddedlein cyfyng, wedi bod yn wir her; nid yn unig rhaid iddyn nhw edrych yn effeithiol ond rhaid iddyn nhw hefyd fod yn wisgoedd sy’n para i edrych ar eu gorau o’r diwrnod cyntaf hyd ddiwedd y panto. Roedd y cast yn bobl hyfryd i weithio â nhw a’u sylwadau yn ein rhyfeddu. Roeddwn i mor falch o weld fy ngwisgoedd ar lwyfan y pantomeim. Mae gweithio ar y sioe wedi rhoi blas i mi ar waith yn y diwydiant.

Ysgrifennwyd a chyfarwyddwyd y sioe gan Richard Tunley; bydd helyntion Jac, ynghyd ag effeithiau arbennig, golygfeydd lliwgar a’r sbri i gyd yn siŵr o fod yn boblogaidd iawn ymhlith y teuluoedd yn y gynulleidfa.

Yn ôl Frank Vickery, un o hoff wynebau’r llwyfan yng Nghymru, sy’n chwarae rhan Dame Trott: “Dyma’r pedwerydd tro i ni gydweithio â’r myfyrwyr ac y mae’r gwisgoedd eleni yn wir eithriadol. Mae’r gwisgoedd i gyd wedi eu teilwra i ffitio’r cymeriadau dan sylw, ac mae hyn yn gwneud gwahaniaeth, gan fod rhaid i ni fod yn gysurus ynddyn nhw wrth actio. Mae ansawdd y gwaith yn broffesiynol iawn a phob manylyn yn ei le – da iawn nhw.”

“